Eskola-jazarpena prebenitzeko proiektua

Orona Fundazioan, balioetan oinarritutako hezkuntzarekiko eta gizarte-bizikidetzarekiko konpromisoa indartzen jarraitzen dugu, proiektu eraldatzaileak babestuz. Oraingo honetan, Ihitten Elkartea babesten dugu, ikus-entzunezkoen arloko emakumeek osatutako elkartea, Bullyingari Galga,  eskola-jazarpenaren aurkako proiektu berritzailearen garapenean.

Datuak argiak dira: Lehen Hezkuntzako haurren %10 eta %20 artean eta Bigarren Hezkuntzako ikasleen %5 eta %10 artean jazarpena pairatzen dute sistematikoki. Askotan, kasu horiek ez dira komunikatzen, eta protokolo espezifikoak aktibatu behar direnean baino ez da jarduten. Ihitten Elkarteak azpimarratzen du prebentzioa funtsezkoa dela, eta bullyingari aurre egiteko modurik onena hori gertatzea saihestea dela.

Bullyingari Galga proiektuak horixe bilatzen du: ikus-entzunezko eduki hurbil eta propioak sortzea, euskaraz landuak eta Euskal Herriko gazteen testigantzekin. Material horiek jazarpen-mota desberdinak landuko dituzte, hala nola ziberbullying-a, LGTBIQ+ kolektiboarekiko diskriminazioa, lodifobia, arrazakeria edo aniztasun funtzionalagatiko bazterkeria, betiere enpatia eta erresilientzia erdigunean jarriko dituen ikuspegi positibo batetik.

Bideoak eta baliabideak haur, gazte, familia eta hezkuntzako profesionalentzat izango dira, eta ikastetxeetan, guraso-elkarteetan, familia-programetan, haur eta gazteen psikologiako zentroetan eta aisialdi hezitzaileko taldeetan erabiliko dira. Helburua gizartea sentsibilizaziorako, prebentziorako eta bizikidetza hobetzeko tresna eraginkorrez hornitzea da.

Gure babesarekin, Ihitten Elkarteak ikastetxeetan benetako behar bati erantzuteaz gain, ekitate soziala eta komunitate irekiago, plural eta solidarioago baten eraikuntza bultzatzen dituen proiektu bat gauzatzen laguntzen dugu.